موجودہ حکومت کا مقصد محض عوامی وسائل کو لوٹنا اور حقوق پر ڈاکہ ڈالنا ہے غلام نبی

الجزیرہ ویب ڈیسک

بلوچستان نیشنل پارٹی کے سنٹرل ایگزیکٹیو کمیٹی کے ممبر اور ضلعی صدر کوئٹہ غلام نبی مری نے بلوچستان میں صحت کے نظام کو در پیش سنگین مسائل اور ناقص حکومتی پالیسیوں کے نقصانات پر شدید تنقید کرتے ہوئے کہا ہے کہ صحت کے نظام کو بہتر بنانے کے لئے ایک موثر نظام کی تشکیل از حد ضروری ہے جس کے لئے پچھلے دنوں گرینڈ ہیلتھ الائنس بلوچستان کے زیر اہتمام پی جی ایم آئی کانفرنس ہال میں آل پارٹیز کانفرنس کا کامیاب انعقاد کیا گیا تھا۔

انہوں نے گرینڈ ہیلتھ الآئنس کی کاوشوں کو سراہتے ہوئے کہا ہے کہ صحت کے شعبے میں ہیلتھ الآئنس کی کارکردگی قابل قدر ہے جو نہایت سنجیدگی کے ساتھ عوام کے صحی مسائل کو اجاگر کر رہے ہیں انہوں نے کہا ہے کہ سرکاری ہسپتالوں کی نجکاری کسی صورت میں قابل قبول نہیں ہے جس کی ہم مذمت کرتے ہیں، سرکاری محکموں کا پرائیویٹائزیشن عوامی حقوق پر شب خون مارنے کے مترادف ہے، نجکاری کی بجائے موجودہ نظام میں اصلاحات کیے جائیں، محکمہ صحت کے ملازمین کے لیے مستقل ملازمتوں سمیت بلوچستان کے ہزاروں بے روزگار ڈاکٹروں، فارماسسٹس، نرسز، فزیوتھراپسٹس، پیرامیڈکس اور دیگر ملازمین کے لیے مستقل بنیادوں پر روزگار فراہم کیا جائے اور میرٹ پر بھرتی کو یقینی بنا کر صحی نظام کو فعال کیا جائے۔

انہوں نے نااہل حکومتی نمائندوں کی بھی مذمت کی ہے اور موجودہ حکومت کے نمائندوں کو مسترد کرتے ہوئے کہا ہے کہ یہ لوگ عوامی مینڈیٹ کے بغیر اقتدار میں آئے ہیں جن کا مقصد محض عوامی وسائل کو لوٹنا اور حقوق پر ڈاکہ ڈالنا ہے انہوں نے کرپشن کے خاتمے اور صحت کے بنیادی ڈھانچے کی بہتری، ہسپتالوں میں صفائی ستھرائی کے نظام کو بہتر بنانے پر زور دیتے ہوئے مطالبہ کیا ہے کہ تمام سرکاری ہسپتالوں کو جدید طبی آلات اور سہولیات سے آراستہ کیا جائے۔ نجکاری کسی مسئلہ کا حل نہیں اس کی بجائے ایک منصفانہ اور مؤثر متبادل نظام تشکیل دیا جائے۔