تاریخ گواہ ہے کہ جن قوموں نے آزادی کی قدر نہیں کی وہ صفحہ ہستی سے مٹ گئیں،ثمینہ ممتاز زہری

کوئٹہ(آن لائن : الجزیرہ ویب ڈیسک)مرکزی نائب صدر بلوچستان عوامی پارٹی سینیٹر ثمینہ ممتاز زہری نے جشن آزادی کی ڈائمنڈ جوبلی کے موقع پر قوم کو مبارکباد دی ہے۔ انہوں نے کہا کہ 14 اگست ہماری آزادی کا دن ہے اور ہم یوم آزادی شایان شان طریقے سے منائیں گے۔جو قومیں آزادی کی قدر نہیں کرتیں وہ ترقی کی دوڑ میں پیچھے رہ جاتی ہیں۔ ان خیالات کا اظہار انہوں نے جشن آزادی کی ڈائمنڈ جوبلی کے موقع پرقوم کے نام اپنے تہنیتی پیغام میں کیا۔، انہوں نے کہا کہ پاکستان طویل جدوجہد اور قربانیوں کے بعد حاصل کیا گیا تھا اور ہمیں اپنی آزادی کی قدر کرنی چاہئے کہ ہم اپنے بزرگوں کی عظیم قربانیوں کی بدولت آج آزاد فضاؤں میں سانس لے رہے ہیں۔

انہوں نے کہا کہ بڑے افسوس سے کہنا پڑتا ہے کہ آج بھی ہمارے ازلی دشمن بھارت نے ہماری آزادی کو تسلیم نہیں کیا اور پاکستان بالخصوص بلوچستان کے خلاف شرپسندانہ کارروائیوں میں ملوث رہتا ہے۔آج بھی بلوچستان میں ایسے بھٹکے ہوئے عناصر موجود ہیں جو آزادی جیسی نعمت کی قدر نہیں کرتے اور پاکستان کے دشمنوں کے ہاتھوں میں کھیلتے ہوئے اپنے ہی وطن کے خلاف دہشتگردانہ کارروائیوں میں ملوث ہیں۔

لیکن دشمن کو یاد رہے کہ پوری پاکستانی قوم ملکی سلامتی کے معاملے پر ایک ساتھ ہے اور دشمنوں کی کسی سازش کو کامیاب نہیں ہونے دیا جائے گا۔ انہوں نے کہا کہ تاریخ گواہ ہے کہ جن قوموں نے آزادی کی قدر نہیں کی وہ صفحہ ہستی سے مٹ گئیں۔ہمیں آزادی کی قدر کرنا چاہئے۔آزاد قومیں اپنا جشن آزادی شایان شان طریقے سے مناتی ہیں اور ہم جشن آزادی ملکی وقار اور شایان شان طریقے سے منائیں گے

انہوں نے کہا کہ آزادی کے بعد ہمارے پیارے ملک پاکستان نے کئی نشیب و فراز دیکھے ہیں دشمنوں نے پاکستان کے استحکام پر کئی وا ر کئے لیکن ہماری افواج نے ان کے ناپاک عزائم کو ہمیشہ خاک میں ملایا اور اس مقصد میں ہمارے جوانوں نے جانوں کے نذرانے بھی پیش کئے جنہیں کبھی بھلایا نہیں جا سکتا۔ انہوں نے مزید کہا کہ حالیہ بارشوں اور سیلاب سے خصوصاً بلوچستان میں بڑے پیمانے نقصان ہوا ہے اور کئی سینکڑوں قیمتی جانوں سمیت ہزاروں گھر مسمار ہو گئے ہیں۔ کھڑی فصلوں اور مال مویشیوں کو بھی بھاری نقصان پہنچا ہے۔اور رہتی دنیا تک شہداء کا نام روشن ستارے کی طرح چمکتا رہے گا۔