کوئٹہ بورڈ نے انٹرمیڈیٹ پارٹ ون اور ٹو کے نتائج کا اعلان کردیا کوئٹہ بورڈ نے انٹرمیڈیٹ پارٹ ون اور ٹو کے نتائج کا اعلان کردیا

بورڈ کے مطابق امتحان میں مجموعی طور پر 99 ہزار 946 طلبہ و طالبات نے شرکت کی جن میں سے 88 ہزار 944 کامیاب قرار پائے، اِس طرح مجموعی کامیابی کا تناسب 89 فیصد رہا۔

نتائج کے مطابق اسلامیہ گرلز کالج کوئٹہ کی طالبہ عائشہ خان دختر غضنفر علی نے 1067 نمبر حاصل کرکے پہلی پوزیشن اپنے نام کی۔

اِسی طرح بی آر سی کالج لورالائی کے طالب علم رسد خان ولد نعمت اللہ نے 1064 نمبروں کے ساتھ دوسری جب کہ اسلامیہ گرلز کالج کوئٹہ کی طالبہ سعدیہ دختر طاہر کامران نے 1061 نمبر حاصل کرکے تیسری پوزیشن حاصل کی۔

بورڈ کے اعداد و شمار میں یہ بھی بتایا گیا کہ بارہویں جماعت کے 53 ہزار 590 اور گیارہویں جماعت کے 46 ہزار 356 طلبہ و طالبات امتحان میں شریک ہوئے، بارہویں جماعت کے 49 ہزار 42 جب کہ گیارہویں جماعت کے 39 ہزار 902 امیدوار کامیاب قرار پائے۔

مزید برآں اعلان کردہ نتائج کے مطابق بارہویں جماعت کی کامیابی کا تناسب 91.5 فیصد جب کہ گیارہویں جماعت کی کامیابی کا تناسب 86.1 فیصد رہا۔