سپریم کورٹ کے اعلامیے کے مطابق جوڈیشل کمیشن نے جسٹس خالد حسین شاہانی کی بطور ایڈیشنل جج سندھ ہائی کورٹ مدتِ تعیناتی میں مزید 6 ماہ توسیع کی سفارش کی جب کہ جسٹس سید فیاض الحسن شاہ کو مستقل جج بنانے کی سفارش نہیں کی گئی۔
کمیشن نے سندھ ہائی کورٹ کے آئینی بینچز کی مدت میں مزید 3 ماہ توسیع کی بھی سفارش منظور کی۔ علاوہ ازیں سندھ ہائی کورٹ کے لیے 3 نئے ایڈیشنل ججز کی تقرری کی سفارش کرتے ہوئے محمد ہمایوں خان، سریش کمار اور ڈاکٹر شاہ نواز میمن کو نامزد کیا گیا جب کہ دو نشستیں مطلوبہ اکثریت نہ ملنے کے باعث خالی رہ گئیں۔
اعلامیے میں بتایا گیا کہ اسلام آباد ہائی کورٹ کے لیے بھی 3 نئے ایڈیشنل ججز کی تقرری کی سفارش منظور کی گئی، جن میں ایاز شوکت، شہرخ ارجمند اور عمیر مجید ملک شامل ہیں۔
دوسری جانب جوڈیشل کمیشن نے پشاور ہائی کورٹ کے چار ایڈیشنل ججز کو مستقل جج بنانے کی سفارش کی، جن میں جسٹس فرح جمشید، جسٹس انعام اللہ خان، جسٹس ثابت اللہ خان اور جسٹس اورنگزیب شامل ہیں۔
علاوہ ازیں سپریم کورٹ کے اعلامیے میں کہا گیا اجلاس میں سندھ، اسلام آباد اور پشاور ہائی کورٹس سے متعلق تقرریوں، مدتِ تعیناتی میں توسیع اور ججز کی کنفرمیشن کے معاملات کا تفصیلی جائزہ لیا گیا۔